Þessir skilmálar eru bindandi samkomulag milli Brennisteins ehf. og notanda kerfisins eSigna. Með því að nýta sér þjónustuna eða staðfesta skilmálana á vef eSigna er gengið frá samþykki. Ef einstaklingur samþykkir skilmálana fyrir hönd fyrirtækis eða stofnunar, ber hann ábyrgð á að hafa fullgilt umboð og skuldbinda bæði sig og lögaðilann með þessu samþykki.
eSigna er stafrænt kerfi sem veitir möguleika á rafrænni undirritun skjala. Brennisteinn ákveður hverju sinni hvaða aðgerðir og virkni eru í boði í kerfinu og getur breytt því án fyrirvara.
Aðgangur að eSigna er án gjalds, en notkun sem felur í sér undirritun er gjaldskyld. Notendur skrá sig inn með rafrænum skilríkjum og aðgangur er tengdur við persónulegt auðkenni sem má ekki deila með öðrum. Notendur geta sjálfir uppfært samskiptaupplýsingar sínar. Áskrifendur fá aðgang að þjóðskrá til að auðvelda val á undirritendum. Skilríkin sem notandinn nýtir við innskráningu og undirritun verða að vera tryggilega varðveitt. Ef notandi telur að aðgangurinn hafi verið misnotaður ber honum að hafa tafarlaust samband við útgefanda skilríkjanna. Brennisteinn getur lokað aðgangi ef öryggi kerfisins er í hættu.
Kerfið má eingöngu nota til lögmætra aðgerða og í þeim tilgangi sem þjónustan er ætluð. Notkun felur m.a. í sér upphleðslu, skoðun og undirritun skjala sem og nýtingu annarra þátta þjónustunnar eftir því sem stendur til boða hverju sinni.
Sá sem sendir skjöl til undirritunar ber alla ábyrgð á innihaldi þeirra, réttum móttökuaðilum og að undirritun fari fram innan tilgreinds tímamarks. Einnig ber hann ábyrgð á að nýta kerfið í samræmi við lög og þessa skilmála.
Skjöl sem hlaðin eru inn verða vistuð í allt að 24 mánuði nema þeim sé eytt fyrr. Að þeim tíma loknum verður þeim sjálfkrafa eytt. Notandi ber sjálfur ábyrgð á að vista eða sækja skjöl sem hann vill varðveita til lengri tíma.
Greiðsluskylda skapast einungis þegar notandi sendir skjöl til undirritunar. Verðskrá er birt á vef eSigna eða samið sérstaklega um. Sé greiðsla ekki innt af hendi innan tilskilins tíma verður aðgangi lokað. Ef vanskil vara í 90 daga eða lengur áskilur Brennisteinn sér rétt til að fjarlægja aðgang og eyða gögnum notandans.
Rafræn skilaboð og tilkynningar eru send á netfang notandans. Skjalastjórnandi getur einnig skráð netfang eða símanúmer undirritenda fyrir slíkar tilkynningar.
Brennisteinn ábyrgist ekki að notkun kerfisins skili tilteknum árangri. Notkun eSigna fer alfarið fram á ábyrgð notandans. Brennisteinn ber ekki ábyrgð á efni skjala, undirritunarfresti eða tæknilegum hnökrum sem kunna að trufla þjónustuna.
Ábyrgð Brennisteins takmarkast við beint tjón sem rekja má til eigin saknæmrar háttsemi. Ekki er bætt fyrir afleitt tjón, t.d. rekstrartap eða tapaðan hagnað. Hámarksskaðabætur takmarkast við greiðslur sem notandi hefur innt af hendi á síðustu þremur mánuðum fyrir atvikið.
Enginn aðili ber ábyrgð á vanefndum sem stafa af atvikum utan valdsviðs hans, svo sem náttúruhamförum, hernaðarátökum eða tilskipunum yfirvalda.
Öll efni og tækni sem tengjast eSigna eru vernduð samkvæmt höfundarétti og vörumerkjalögum. Endurgerð, afritun eða dreifing slíks efnis er óheimil nema með skýru leyfi frá Brennisteini.
Það er stranglega bannað að nota kerfið í tilgangi sem telst ólöglegur eða getur skaðað aðra. Allar slíkar tilraunir geta leitt til aðgangslokunar og mögulegrar lögsóknar.